طريقه تمليح الطعوم بشكل صحيح ( بالتفصيل الممل )
اولا نبدأ ( بالعقر )
العقر هوا نوع من انواع الجمبر زات اللون البرتقالى والعقر ده ممتاز جدا للشط والتسقيط وهوا طعمايه ممتازه جدا لمعظم انواع السمك مثل المرمار والغزيله والزجاريا والغلانفيش والدنيش والشراغيش
ندخل على طريق تمليحه
هنجيب كيلو عقر او على حسب الكميه الى انت شاريها والكيلو بيعمل فى حدود 30 جنيه من اى سوق سمك او من الحلقه هنجيب العقر ونجيب جرنال وناخد من الجرنال ده ورقتين ونحطهم على طرابيزه ونجيب العقر نفضيه على الجرنال ده ونفرده بحيس يصفى المياه بتاعته وتسيبه من ربع ساعه لنص ساعه
بعد كده بتغير ورقتين الجورنال دول وبردو بتفرد العقر عليهم وتسيبه ساعه لحد ما تتأكد ان الميا بتاعته اتصفت كده تمام
هتشيل العقر وتفرد ورقتين جورنال تانى وتفرد العقر عليهم وتجيب كيس ملح خشن مش ناعم الناعم بيخلى الطعمايه مش مظبوطه لانه بيجمع مايه يفضل الملح الخشن لو ملقتش فى ملح اسمه ملح رشيدى خرز بيتباع فى الاسواق فرت ممكن تشترى ربع كيلو هيكفيك كتير قوى
بعد ما تفرد العقر على الجورنال هتجيب كبشه ملح صغيره على حسب الكميه ومتكترش ملح رش الملح على العقر بحيث ان العقر كله يوصله الملح وتسيب العقر فى مكان مهور بس مش فى الهوا او الشمس يعنى مثلا فى مكان بعيد فى المطبخ وتسيبه لحد ما تتاكد ان الملح سحب كل الميا الى فى العقر .
بعد كده يا سيدى هتجيب كياس لبن او اى كياس الزيرو الصغير وتقسم العقر الى اربع او اقل على حسب الكميه الى انت هتصطاد بيها وتجيب ورقه جورنال وبتحت الكميه بتاعتك فى الورقه وتلفها برفق وبتحت الورقه دى داخل الكيس وبعد كده هتقفل الكيس بتاعك وهتكرر ده فى الكميه كلها وهتحفظه داخل الفريزر بتاعك وكل ما تطلع بتاخد كيسه من الكياس دى تصطاد بيها وهكذا
الدود ( قراص ونار ورمله ودود بحر )
المشرشر والاسمعلاوى لا يصلح للتمليح
هنستعمل نفس الطريقه الى احنا استعملناها فى العقر بس حاول انك تقلل كميه الملح وزى ما انا كاتب فى دود يصلح للتمليح ودود لايصلح للتمليح وهنقول ليه
الاسمعلاوى لو جيت انت حضرتك عايز تملحه ورشيت عليه الملح هتلاقى الدوده صفت الحمار بتاعها واسودت خالص وممكن تلاقى الدود اتهرت منك يفضل الصيد بيه زى ما هوا وهوا حى فقط
نيجى للمشرشر _ الدود المشرشر بطبعه طعمايه ضعيفه بتتقطع بصرعه علشان كده ليه تطعيمه معينه لو بتحب تشوح بيه وبردو مش هتشوح جامد ولو جيت تملحو هيتبهدل منك والملح ممكن ياكلو او يهريه
طريقه بقى الحفاظ على الدود حى لو انت هتطلع تصطاد قريب
نيجى للمشرشر حضرتك بتجيب صنيه المونيوم وبتجيب ميه من البحر وميا من الفلتر وبتجيب زجاجه 2 لتر بتفضى ربعها ميه من البحر وتلت ارباعها مياه من الفلتر وهقول الفلتر ليه لان ميه الحنفيه بتكون داخلها كلور الكلور ده بيخلى الطعمايه تموت منك ومتقعدش كتير
بعد ما بنعاير الميا بتاعتنا بنجيب الصنيه بتاعتنا ونجيب مصفى الاول وفى الحوض نفضى كيس الدود المشرشر داخل المصفى بتاعتنا لحد ما الدود بس يكون فى المصفى وبعد كده نكب الدود ده داخل الصنيه ونجيب الميا نغطى بس الدود متكترش ميا غطى الدود بس وباكد على كده
وحضرتك هتحط الصنيه فى التلاجه من تحت فوق درج التلاجه وحضرتك كل ما تلاقى الميه لونها اتغير احمرت فى الصنيه هتكرر العمليه دى وتغير الميا وبكده هيعيش معاك المشرشر من اسبوع ل 10 ايام
الجمبرى ( نطاط _ شطناره _ خشابى )
خلصت صيد وعاك طعم كتير ومش عارف ازاى هتخليه يعيش معاك لحد ما تطلع تانى تعمل ايه هتجيب جردل كبير او لو عندك حوض سمك فاضى مش بتستعمله هتحط فيه الجمبرى بتاعك وهتجيب ميه عاديه جدا مش شرط ميه بحر وتملى ربع الحوض او الجردل بتاعك وتحط الجمبرى بتتاعك داخل الحوض وتشغل ماتور هوا يفضل بالكهربا لانك فى البيت وتحاول تغطى الحوض بحيث يكون المكان بتاع الجمبرى ده معتم لان الضوء بيتعب الجمبرايه جدا ويقلل نسبه حياتها
هتشغل ماتورك وكل فتره تتابع الجمبرى هتلاقى فى جمبرى بيموت منك بس مش كتير علشان هوا بياكل بعضه انت بايدك الجمبرى الى تلاقيها ابيضت او لقيت قشرتها شيلها متسيبهاش داخل الحوض نهائى
وبكده هيفضل عايش معاك فتره كبيره
