سمكه القاروص
ناس كتير اتكلمت عن السمكه دى لمتعتها فى الطلوع بس هنتكلم عنها بشويه فنيات اكتر
القاروص سمك موسمى بمعنى ان ليه موسم معين بيدخل فيه مثلا من شهر 11 حتى شهر 5 وبيحب الميا الساقعه يعنى فى الشتا طبعا
القاروص سمك من اسماك القرص بمعنى _ انو سمك مهاجم على الاسماك الصغيره بيقرص وراها علشان كدا بيكون فى ناس بتشتغل عليه بالربلات او بمعنى ادق الطعوم الصناعيه
شغل القاروص بيكون بالمكنه والبوصه اليد وكل واحد وعلى حسب الشغل بتاعو معظم شغل القاروص بالمكنه بيكون بالفله المجنونه ودى طريقه نجحت كتير جدا لانك بتقدر بالفله المجنونه دى انك تظبط عيارك صح
الشغل التانى بالمكنه الى هوا المخايله او التجريه بالربلات الصناعيه او الجرنجو او الجمبرى الجيلاتينى
افضل شغل للقاروص بالمكنه بيكون ساق واحد ودا لو شغال بطعمايه حيه مثل النطاط او الخشابى او الشطناره
البوصه اليد بيكون ساقين طوال وفله معقوله وسط وسلاح يفضل ان يكون 5 او 4 ودا الشغل الى احنا بنشتغل بيه لان القاروص بقو كبير وبيبلع وعايز سلاح كبير يعشق فى معدتو طبعا سلاح صغير يهيف منك سمك كتير
طعمايه القاروص طبعا
مشرشر _ قراص _ دود نار _ وجمبرى شطناره _ خشابى وعل فكره الجمبرى ليه وقت معين زى المشرشر كدا
المشرشر عايز مثلا من نص 10 حتى شهر 3 على حسب ظهورو
القاروص انواع زى ما احنا عرفنا او فصيله مثلا واحده الى هما
السياسى من ربع الى كيلو
القاروص من كيلو وطالع
النقط بيكون من نفس الفصيله بس عليه نقط سودا فى الضهر ودا فى منو نقط رفيع وللاسف الصيادين بتخدو وفى نوع تانى الى هوا النقط الشويحى
ميناء اسكندريه والدخيله والحاجز الغربى ودا عايز صيد باليل لو هتشتغل بالمشرشر علشان بالنها المرعى هتبهدل الطعمايه
ميناء ادكو والمعديه ورشيد المصيف والبوغاز
ودا الصيد فيها نهار او ليل لقله المرعى او السمك الرفيع سمك ادكو ورشيد بيكون فيه فى زعنفته زراق لون ازرق زى سمك بلطيم والبرلص
اما سمك اسكندريه والساحل بيكون ابيض وبالزات سمك الساحل او مارينا لانو راعى على ارض رمليه ومفيهاش وعر كتير او معدومه الوعر
يارب اكون قدرت اوصل المعلومه صح وعن تجربتى الشخصيه ولا انقل من احد الحمد لله
ربنا يزدنا علم لنعم بيه الفائده على الناس
